Sequentia Lauda, Sion
| Verba (S. Thomas Aquinas, AD 1264) | |
|
Lauda ducem et pastorem In hymnis et canticis. Quantum potes, tantum aude, Quia maior omni laude, Nec laudare sufficis. Laudis thema specialis Panis vivus et vitalis Hodie proponitur. Quem in sacræ mensa coenae Turbae fratrum duodenae Datum non ambigitur. Sit laus plena, sit sonora; Sit iucunda, sit decora Mentis iubilatio, Dies enim solemnis agitur In qua mensæ prima recolitur Huius institutio. In hac mensa novi Regis Novum Pascha novae legis Phase vetus terminat. Vetustatem novitas, Umbram fugat veritas, Noctem lux eliminat. Quod in coena Christus gessit, Faciendum hoc expressit In sui memoriam: Docti sacris institutis Panem, vinum in salutis Consecramus hostiam. Dogma datur Christianis, Quod in carnem transit panis Et vinum in sanguinem. Quod non capis, quod non vides, Animosa firmat fides Præter rerum ordinem. Sub diversis speciebus, Signis tantum et non rebus, Latent res eximiae: Caro cibus, sanguis potus, Manet tamen Christus totus Sub utraque specie. A sumente non concisus, Non confractus, non divisus Integer accipitur. Sumit unus, sumunt mille, Quantum isti, tantum ille, Nec sumptus consumitur. Sumunt boni, sumunt mali, Sorte tamen inæquali, Vitæ vel interitus. Mors est malis, vita bonis, Vide paris sumptionis Quam sit dispar exitus Fracto demum sacramento, Ne vacilles, sed memento Tantum esse sub fragmento, Quantum toto tegitur. Nulla rei fit scissura, Signi tantum fit fractura, Qua nec status nec statura Signati minuitur Ecce panis Angelorum, Factus cibus viatorum, Vere panis filiorum, Non mittendus canibus! In figuris praesignatur, Cum Isaac immolatur, Agnus Paschæ deputatur, Datur manna patribus. Bone pastor, panis vere, Jesu, nostri miserere, Tu nos pasce, nos tuere, Tu nos bona fac videre In terra viventium. Tu qui cuncta scis et vales, Qui nos pascis hic mortales, Tuos ibi commensales, Cohæredes et sodales Fac sanctorum civium. Amen. Alleluia. |
|
Actus a choro Cantica:
Dominica 2 Iunii 2013, Sollemnitas Sanctissimi Corporis et Sanguinis Domini
Dominica 1 Iunii 2014, Festum in Visitatione B.M.V.
Dominica 3 Augusti 2014, Dominica decima octava per annum
Dominica 7 Iunii 2015, Dominica Sanctissimi Corporis et Sanguinis Christi
Dominica 5 Iunii 2016, Dominica decima per annum
Sabbato 3 Iunii 2017, Dominica Pentecostes (Sollemnitas)
Dominica 4 Iunii 2017, Dominica Pentecostes (Sollemnitas)
Sabbato 2 Iunii 2018, Dominica Sanctissimi Corporis et Sanguinis Christi
Dominica 3 Iunii 2018, Dominica Sanctissimi Corporis et Sanguinis Christi
Dominica 9 Aprilis 2023, Dominica Resurrectionis (Sollemnitas)
Dominica 2 Iunii 2024, Dominica Sanctissimi Corporis et Sanguinis Christi